مه‌رج و رێنمایێن وه‌رگرتنا قوتابیێن ده‌ره‌كی

به‌رپرسێ پشكا ئه‌زموونان ل رێڤه‌به‌ریا په‌روه‌رده‌یا دهۆك رۆژئاڤا دیار كر كو ده‌رگه‌هێ وه‌رگرتنا قوتابیێن ده‌ره‌كی ل پۆلا 5 بنه‌ره‌ت هه‌تا 11 ئاماده‌یی بۆ سالا خواندنێ 2018-2019 هاته‌ ڤه‌كرن و پێشكێشكرن هه‌تا 30/10/2018 دێ یا به‌رده‌وام بیت.
خویا ژی كر كو ژ دایكبوویێن 1999 و به‌ر ب خوارێ مافێ هه‌ی پێشكێشی پۆلێن قۆناغا بنه‌ره‌ت بكه‌ن، ژ دایكبوویێن 2000 – 2001 – 2002 ژی هه‌كه‌ دو سالان ل ئێك پۆل كه‌فت بن وان ژی مافێ خواندنێ ل قوتابخانه‌یێن رۆژ نامینیت و دشێن پێشكێشی ده‌ره‌كی بكه‌ن، 2003 و پێهه‌ل هه‌كه‌ دو سالان ل پۆلا خوه‌ كه‌فت بن مافێ هه‌ی هه‌ر بمیننه‌ ل خواندنا ب رۆژ.
ل دۆر وان قوتابیێن مافێ ده‌ره‌كی ل پۆلێن 10 و 11 ئاماده‌یی هه‌ی ، خالد ئه‌حمه‌د خالد دیار كر كو ئه‌و كه‌س دشێن پێشكێشی ڤان هه‌ردو پۆلێن ئاماده‌یی بكه‌ن یێن مافێ خواندنێ ل قوتابخانێ نه‌مینیت ئه‌و ژی ژ دایكبوویێن 1994 كور و 1993 كچ و به‌ر ب خوارێ، هه‌روه‌سا قوتابیێن دو سالان ل پۆلا خوه‌ دمینن یان دێ چنه‌ قوتابخانه‌یێن ئێڤاران یان ژی دێ پێشكێشی ده‌ره‌كی كه‌ن و گۆت:(ل دووڤ بڕیارا وه‌زاره‌تا په‌روه‌ردێ ئه‌ڤ ساله‌ پێشكێشكرن بۆ پۆلێن 10 و 11 پیشه‌یی نابیت).
ناڤهاتی ئاشكرا كر هه‌ر قوتابیه‌كێ پێشكێشی ده‌ره‌كی وه‌رزی دكه‌ت، پێدڤیه‌ شه‌ش وێنان و كۆپیه‌كا ناسنامێ ل گه‌ل خوه‌ بینیت و دێ سه‌ره‌دانا په‌روه‌ردێ كه‌ت و فۆرمه‌كێ وه‌رگریت و ل دووڤ دا دێ ل قوتابخانێ داگریت و پاشی دێ زڤڕینته‌ په‌روه‌ردێ و فایل دێ بۆ هێته‌ ڤه‌كرن و وه‌ك قوتابیه‌كێ ده‌ره‌كی دێ هێته‌ وه‌رگرتن.
خویا ژی كر كو پشتی قوتابی دهێنه‌ وه‌رگرتن، قوتابیێن ل سالا بۆری ئه‌زموونێن ده‌ره‌كی كرین جاره‌كا دی هه‌ر دێ چنه‌ وان قوتابخانان، چونكو تۆمار بۆ وان ل وان قوتابخانان یێن هاتینه‌ ڤه‌كرن و یێن دی ل دووڤ حه‌زا وان دێ ل سه‌ر قوتابخانان هێنه‌ به‌لاڤكرن.
سه‌باره‌ت ژڤانێ‌ وه‌رگرتنا قوتابیێن ده‌ره‌كی بۆ پۆلا 12 ئاماده‌یی، به‌رپرسێ پشكا ئه‌زموونان دیار كر كو پشتی 30/10 دێ ده‌ست ب وه‌رگرتنا قوتابیێن ده‌ره‌كی بۆ پۆلا 12 ئاماده‌یی هێته‌ كرن و ل 1/11/2018 ژی قوتابیێن ئێك و دوو بابه‌ت ل گه‌ل چاككرنا تێكرایی دێ‌ ده‌ست پێ‌ كه‌ت.

The post مه‌رج و رێنمایێن وه‌رگرتنا قوتابیێن ده‌ره‌كی appeared first on رێڤەبەریا پەروەردا قەزا دهوك روژئاڤا.

نووسراوه‌ له‌لایه‌ن
azad nisry